Глас 1. В понедельник утром. Тропари и стихиры на каждый день

Седа́льны умили́тельны. Гла́с 1:

В беззако́ниих зача́т е́смь а́з блу́дный, не сме́ю взира́ти на высоту́ небе́сную. Но дерза́я на человеколю́бие Твое́ зову́: Бо́же, очи́сти мя́ и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

А́ще пра́ведник едва́ спаса́ется, а́з где́ явлю́ся гре́шный? тяготы́ и зно́я дневна́го не понесо́х: но с нае́мники единонадеся́таго часа́ сопричти́ мя Бо́же, и спаси́ мя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Пречи́стая Богоро́дице, Я́же на Небесе́х благослове́нная, и на земли́ славосло́вимая: ра́дуйся Неве́сто Неневе́стная.

Седа́льны. Гла́с 1.

Объя́тия О́тча отве́рсти ми́ потщи́ся, блу́дне ижди́х мое́ житие́, на бога́тство неиждива́емое взира́яй щедро́т Твои́х Спа́се, ны́не обнища́вшее мое́ се́рдце не пре́зри. Тебе́ бо, Го́споди, во умиле́нии зову́: согреши́х Ти́, спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Суди́ще Твое́ стра́шно, и су́д пра́веден, дела́ моя́ лю́та: но Ты́ Ми́лостиве, предвари́в мя́ спаси́, и му́ки свободи́, и изба́ви, Влады́ко, шу́их ча́сти, и сподо́би одесну́ю Тебе́ ста́ти, Судие́ Пра́веднейший.

Сти́х: Ди́вен Бо́г во святы́х Свои́х, Бо́г Изра́илев.

Страда́ния похвало́ю, венце́в досто́инством, сла́внии страстоте́рпцы оде́яшася Тобо́ю Го́споди: терпе́нием бо ра́н, беззако́нных победи́ша, и си́лою Боже́ственною с Небесе́ побе́ду прия́ша. Те́х моли́твами и мене́ свободи́ от неви́димаго врага́, Спа́се, и спаси́ мя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Упра́ви, Чи́стая, окая́нную мою́ ду́шу, и уще́дри ю́ от мно́жества прегреше́ний, во глубину́ попо́лзшуюся поги́бели, Всенепоро́чная, и в ча́с мя́ стра́шный сме́ртный Ты́ исхити́ оглаго́лующих де́монов, и вся́кия му́ки.

Седа́льны. Гла́с 1.

Безу́мно от Тебе́ удали́вся, Всеще́дре, блу́дно мое́ ижди́х житие́, рабо́таяй страсте́м безслове́сным всегда́: но приими́ мя а́нгелов моли́твами, О́тче Благоутро́бне, я́коже блу́днаго о́трока, и спаси́ мя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Невеще́ственных во́инств преиму́щая Отрокови́це, и чи́ны Небе́сныя превосходя́щая еди́на, досто́йную похвалу́ от ни́х прие́млеши, Всечи́стая: но моли́ Сы́на Твоего́ со А́нгелы, е́же изба́витися мне́ от страсте́й мучи́тельства, еди́ному осужде́нному.

На стихо́вне стихи́ры умили́тельны, гла́с 1:

И́н тя́ ми́р, душе́, ожида́ет, и Судия́ хо́щет твоя́ обличи́ти та́йная и лю́тая. Не пребу́ди у́бо в зде́шних, но предвари́ вопию́щи Судии́: Бо́же, очи́сти мя́, и спаси́ мя.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Не пренебрези́ мене́, Спа́се мо́й, ле́ностию грехо́вною одержи́ма, воздви́гни мое́ помышле́ние к покая́нию, и Твоего́ виногра́да де́лателя иску́сна покажи́ мя: да́руй ми́ единагона́десяте часа́ мзду́, и ве́лию ми́лость.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Страстоте́рпцы Христо́вы, прииди́те лю́дие вси́ почти́м, пе́ньми и пе́сньми духо́вными, свети́льники ми́ра, и пропове́дники ве́ры, исто́чник приснотеку́щий, из него́же истека́ют ве́рным исцеле́ния: те́х моли́твами, Христе́ Бо́же на́ш, ми́р да́руй ми́ру Твоему́, и душа́м на́шым ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Святе́йшая святы́х все́х Си́л, Честне́йшая всея́ тва́ри Богоро́дице Влады́чице ми́ра, спаси́ ны Спа́са ро́ждшая, от прегреше́ний тмори́чных и бе́д, я́ко блага́я, моли́твами Твои́ми.

Блаже́нна, гла́с 1:

Сне́дию изведе́ из Рая́ вра́г Ада́ма: Кресто́м же введе́ Христо́с во́нь разбо́йника, помяни́ мя, Го́споди, вопию́ща, егда́ прии́деши во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Умиле́ний исто́чник ми́ да́руй благоутро́бием Твои́м, Христе́ Бо́же, вся́кия мя́ скве́рны зо́л безме́рных очища́ющий, и Ца́рствия Твоего́, Благоде́телю, прича́стника мя́ сотвори́.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

А́нгел Твои́х чи́ны в моле́ние приво́дим Ти́, Христе́, спаси́, уще́дри на́с те́ми, я́ко Пребла́г, вся́ презира́яй на́ша, я́же в ве́дении и не в ве́дении, прегреше́ния.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Крове́й ва́ших, святи́и, тече́ньми, мы́сленнаго фарао́на потопи́сте я́ве: ны́не же источа́ете чуде́с то́ки, пучи́ну изсуша́ющыя неду́гов. Те́мже блажи́ми есте́.

Сла́ва Отцу́ и Сы́ну и Свято́му Ду́ху:

Отцу́ поклони́мся, и Сы́на славосло́вим, и Всесвята́го Ду́ха вси́ ве́рнии воспои́м, зову́ще и глаго́люще: Всесвята́я Тро́ице, спаси́ вся́ ны́.

И ны́не и при́сно и во ве́ки веко́в. Ами́нь:

Богоро́дичен: Ро́ждшая Све́т Безле́тный, омраче́нную ду́шу мою́ при́сно де́монов прило́ги, световоди́, Пренепоро́чная, и огня́ бу́дущаго хода́тайствы Твои́ми свободи́.